Екеумізде арман да ортақ, бірге үміт | Qazbrand.info

Екеумізде арман да ортақ, бірге үміт
(Ерлі – зайыпты жандардың бір – біріне деген тілегі – Жар лебізі)

Екеумізде арман да ортақ, бірге үміт,
Жанымызға жуытпаймыз бір күдік.
Сен алыстан оралғанда үйіңе,
Шаңыраққа бірге енеді күн күліп.

Осы күнді шын бақыт күн екен де,
Мүлкіміз де ортақ біздің екеуге.
Мейірім де ортақ, соны сезген сәбиіміз
Еркеліктен жыламайды бекерге.

Соның салар әнін бірге ұғамыз,
Сол қыңқ етсе, құрақ ұшып тұрамыз.
Жүрек те ортақ, сезім де ортақ екеуге,
Махаббат та – ортақ бізге бір аңыз.

Жексенбіде дамыл тап та біршама,
Думан күнге қанша қалды, күн сана.
Біздерге ортақ емес пе еді туған күн,
Күнтізбеде бөлек – бөлек тұрса да.

Сан естіртіп сазын ән мен жырлардың,
Тойланады біздерге ортақ туған күн.
Кел, тағы да есімізге алайық
Мағынасын бірге өткізген жылдардың.

Бұл шаттық та жаннан әсер тапты деп,
Айтайық сосын жаз көңілмен ақ тілек.
Өткен жылдың еске алайық бір сәтін,
Сондай қызық басымыздан өтті деп.

Айта алмасақ, қуанышта бекер ғой,
Салмақты айтайық, болмаса да бөтен той.
Бірақ, жаным, тілек айту керек пе,
Біздің тілек онсыз да ортақ екен ғой.

Авторы:
Ғабиден ҚОЖАХМЕТ,
Қызылорда қаласы


Ерлі зайыпты жандардың бір біріне деген тілегі Жар лебізі әйелінің күйеуіне күйеуінің әйеліне арнау өлеңі

© Дереккөзі

Rating
( No ratings yet )
Like this post? Please share to your friends: