ТАРАЗҒА ҮНДІСТАННАН ҚАЗАҚСТАНДЫҚТАР ҰШЫП КЕЛДІ

2020 04 04 14 33 16

Таразда Үндістаннан келген 91 қазақстандық карантинге жатқызылды. Бұл туралы Жамбыл облысы әкімінің баспасөз қызметі мәлім етті, – деп хабарлайды NewsRoom+ ақпарат агенттігінің тілшісі Tengrinews.kz сайтына сілтеме жасап. 

Жұма күні сағат 22.30-да Әулие-Ата халықаралық әуежайына Дели-Тараз бағытындағы ұшақ қонды. Бортта 106 адам болған, оның ішінде 91 адам қазақстандық және 15 Қырғызстан азаматы. Барлық жұмылдырылған қызметтер алдын ала ескертіліп, жолаушыларды қабылдауға дайындалды.

«Екі адам дене қызуының жоғарылауына байланысты провизорлық стационарға орналастырылды. Барлық жолаушыдан талдау алынып, зертханаға жіберілді. Коронавирус анықталмаса, олар тұрғылықты жері бойынша 14 күн үй карантиніне жіберіледі», – делінген хабарламада.

Сондай-ақ, жолаушылардың барлық жеке заты, автобустар мен жедел жәрдем көлігі өңдеуден өтті. Ал Қырғызстан азаматтары арнайы автокөлікпен өз еліне кетті.